بس قبل ما اكلمك عن كهرباء باور تحديدا لازم اديك فكره عن قسم كهرباء بشكل عام الأول
قسم كهرباء جواه 3 شعب :
1- شعبه باور
2- شعبه اتصالات والكترونيات
3- شعبه حاسبات
هنتكلم بالتفصيل فى مقالات تانيه منفصله عن كل شعبه بس انهارده خلينا نركز على شعبه باور
بص احنا عندنا بشكل اساسى 3مجالات تقدر تشتغل فيهم بعد التخرج وعايزك تصبر معايا
للاخر
1- مجال ال generation او التوليد :
بنتكلم عن محطات التوليد بانواعها سواء محطات الثرمو او الهيدرو او محطات الطاقه المتجددة زى محطات الطاقه الشمسيه او محطات ال wind energyالى هيا طاقه الرياح.
وطالما اتكلمنا عن توليد الكهرباء ف لازم على طول هتكلم عن نقل الكهرباء.
هتدرس حاجه اسمها transmission lines ودى هي أبراج الكهرباء و الكابلات الى بتشوفها رابطه من برج للثانى.
لازم تبقى عارف ان انا بديك مسميات وبحاول ابسطلك الموضوع بس لما تخش هتلاقى الموضوع بتفاصيله
طب انا لو عايز اشتغل في مجال توليد الكهرباء، فرص الشغل هلاقيها فين بالظبط ؟
فرص العمل في الحته دى مش قد كده لكن اكتر الفرص الى هتلاقيها هتلاقيها في محطات الطاقه الشمسية وده مقارنة ب الفرص الى موجوده في في مجال التوليد بشكل عام عشان لو حابب حته التوليد ف وفر وقت وركز على الطاقه الشمسية اكتر.
2- مجال ال distribution او التوزيع الكهربى :
وده شغله بيكون في شركات المقاولات وهنا بنتكلم عن الكهرباء بتاعت المباني من توزيع اضاءه ل باور لانظمه الايت كارنت زى نظام الساوند و كاميرات المراقيه وغيره وهنا المهندس طبيعة شغله بتتقسم لحاجتين :
مهندس المكتب الفني :
وده بيبقى مسؤول بشكل عام عن الرسومات الكهربيه للمبنى او المشروع
مهندس الموقع :
هو بيبقى مسؤول عن تنفيذ التصميمات الكهربية الى حطها مهندس المكتب الفنى
طبعا الموضوع ك تخصص سواء مكتب فنى او موقع فيه تفاصيل تانيه بيختلف دورك سواء كنت شغال مع استشارى او مع مقاول ولو عايز تعرف الفرق بينهم ف خلينى اعرفهولك على السريع
عندنا المستثمر الفلانى عايز يعمل مشروع معين وليكن فندق ف بيروح يتفق مع مكتب استشارى، المكتب الاستشاري ده بيبقى ليه دور انه يعمله تصميم الفندق الانشائى و الكهربي وبيكون مشرف على عمليه التنفيذ الى بيقوم بيها المقاول.
ولما بنقول مقاول ف انا بنقصد شركة مقاولات دورك كمهندس موقع شغال مع مقاول انك تنفذ التصميمات الكهربيه ، لكن دورك كمهندس موقع شغال مع استشارى هو انك تشرف على المقاول وبتستلم منه الشغل وتتاكد انه معمول صح طبقا للرسومات وطبقا للكود المصرى، والفتره الأخير ده من اكتر المجالات الى بيتجه ليها مهندسين كهرباء
3- مجال الكنترول او التحكم الالى :
خلينى افهمك الاول يعنى ايه كنترول.
ببساطة خالص انت لو دخلت مصنع ولقيت ماشين معينه ف هي لاازم يوصلها كهرباء عشان تشتغل، الفكرة هنا انها مش هتشتغل بالكهرباء وخلاص لازم في مخ يقول للماشين دى تشتغل ازاى او تعمل ايه هو ده الكنترول
مثال تانى هيوضحلك الصورة اكتر .. انا لو عندى مصدرين كهرباء مصدر كهرباء اساسى الى هو كهرباء الحكومه عادى خالص ومصدر كهرباء احتياطي الى هو generator، انا اشتريته عشان لما الكهرباء تقطع اشغل المولد ومحتاج ان الكلام ده يحصل اوتوماتيك " ان بعد ما الكهرباء تقطع ب 10ثوانى المولد يشتغل لوحده " بعمل ده ازاى ؟
بعمل ده عن طريق لوحه كنترول بوصلها بالمصدرين بتوعى بشكل معين وبتكون المخ الى بيشغل اى مصدر من مصدرين الكهرباء بتوعى ومش مهم خالص تعرف اللوحه دى بتتعمل ازاى احنا بس بنفهم يعنى تحكم او كنترول.
طب شغل الكنترول بيكون فين ؟
بيكون في المصانع ومهندس الكهرباء هناك بيشتغل ك مهندس صيانه.
طيب عندنا في الكنترول حاجه اسمها industrial automation ده مجال واسع وكبير فخلينى اختصرلك ببساطه ده ايه
مهندس الاوتوميشن ده مسؤؤل عن تصميم اللوحات الكهربيه عن طريق معرفته بحاجه اسمها كلاسيك كنترول و معرفته كمان ببرمجه ككنترولر اسمه PLC وغيرها من الحاجات الى محتاج يبقى عارفها بس دى مش قصتنا دلوقتى.
طيب مهندس الاوتوميشن ده بيعمل ايه برضو ؟
انا هديك مثال هو هيوصلك الفكره لكن خليك عارف ان الموضوع اعمق من كده بكتير.
هنفترض ان عندى ماتور انا عايز لما اضغط على الزرار ده يتحرك في اتجاه ولما اضغط على زرار تانى يتحرك في عكس الاتجاه بقدر اعمل الكلام ده عن طريق لوحه بتصممها وبوصلها بالماتور بتاعى
بس كده دى كانت اهم المجالات الى هتقابلها في سوق العمل لما تتخرج من قسم كهرباء لو لسه مقررتش التخصص بتاعك خد لفه على باقى الأقسام وصلى استخاره وتوكل على الله
التعليقات: